Categories
Film News

കപ്പേള നെറ്റ്ഫ്‌ലിക്‌സില്‍ ജൂണ്‍ 22 മുതല്‍

ലോക്ഡൗണ്‍ പ്രഖ്യാപിച്ച സമയത്ത് കേരളത്തിലെ സ്‌ക്രീനുകളില്‍ റിലീസ് ചെയ്ത ചിത്രമാണ് കപ്പേള. മാര്‍ച്ച് 4ന് റിലീസ് ചെയ്ത സിനിമ നല്ല പ്രതികരണത്തോടെ തിയേറ്ററുകളില്‍ പ്രദര്‍ശിപ്പിച്ചുകൊണ്ടിരിക്കെയാണ് ലോക്ഡൗണ്‍ എത്തിയത്.

കപ്പേള തിയേറ്ററുകളില്‍ കാണാന്‍ സാധിക്കാത്തവര്‍ക്കായി രണ്ടാമതൊരു അവസരം വന്നിരിക്കുകയാണ്. ഇത്തവണ വീട്ടില്‍ നിന്നും തന്നെ സിനിമ കാണാം. സിനിമയുടെ സ്ട്രീമിംഗ് റൈറ്റ്‌സ് നെറ്റ്ഫ്‌ലിക്‌സ് നല്ല വിലയ്ക്ക് സ്വന്തമാക്കിയിരിക്കുകയാണ്. ജൂണ്‍ 22ന് ചിത്രം പ്രദര്‍ശിപ്പിച്ചു തുടങ്ങും.

കപ്പേള, നടന്‍ മുഹമ്മദ് മുസ്തഫ ഒരുക്കിയ സിനിമയാണ്. അദ്ദേഹം പാലേരി മാണിക്യം, ബാവൂട്ടിയുടെ നാമത്തില്‍, പെണ്‍പട്ടണം തുടങ്ങിയ സിനിമകളില്‍ ശ്രദ്ധേയമായ കഥാപാത്രങ്ങളെ അവതരിപ്പിച്ചിട്ടുണ്ട്. നിഖില്‍ വാഹിദ്, സുധാസ് എന്നിവര്‍ക്കൊപ്പം മുസ്തഫ തിരക്കഥ ഒരുക്കിയിരിക്കുന്നു. അന്ന ബെന്‍, ശ്രീനാഥ് ഭാസി, റോഷന്‍ മാത്യു എന്നിവര്‍ പ്രധാനകഥാപാത്രങ്ങളായെത്തുന്നു. അമ്പിളി ഫെയിം തന്‍വി റാം, ജെയിംസ് എലിയ, വിജിലീഷ്, നവാസ് വള്ളിക്കുന്ന്, സുധീഷ്, നിഷ സാരംഗ്, സുധി കൊപ്പ എന്നിവര്‍ സഹതാരങ്ങളായെത്തുന്നു.

സിനിമാറ്റോഗ്രാഫര്‍ ജിംഷി ഖാലിദ്, സംഗീത സംവിധായകന്‍ സുശിന്‍ ശ്യാം, എഡിറ്റര്‍ നൗഫല്‍ അബ്ദുള്ള എന്നിവരാണ് അണിയറയില്‍. കഥാസ് അണ്‍ടോള്‍ഡ് ബാനറില്‍ വിഷ്ണു വേണു സിനിമ നിര്‍മ്മിച്ചിരിക്കുന്നു.